Impakaamo ni DOJ Secretary Fredderick Vida idi kalman a ti panangibangon iti baro a Regional Prosecution Office iti rehion Cordillera ket maysa a “game changer” para iti panangpapigsa iti hustisia iti Northern Luzon.
Daytoy ti imbagana bayat ti panagbisita ken pannakipasetna iti Legal Aid Mission iti maysa nga unibersidad iti siudad ti Baguio.
Sigun kenni Vida, mangitugot ti opisina iti naparpartak ken nalaka nga akses iti hustisia kadagiti komunidad iti Cordillera, makatulong iti panagkessay iti pannakaitantan iti panangrisut iti kaso, ken mapapigsa iti koordinasion iti lokal a gobierno ken kadagiti law enforcement agencies para iti nataltalged a rehion.
Kinunana a ti panangibangon iti opisina ket nakabaser iti Executive Order No. 220 (1987) a nangibangon iti Cordillera ken iti Republic Act 10071 wenno Prosecution Service Act of 2010, a panggepna a papigsaen ken i-rationalize ti national prosecution service iti pagilian.
Iti dua nga aldaw a panagtaripnong iti rehion, tinalantan da Vida, kadua ni DOJ Undersecretary Ian Norman Dato at Assistant Secretary Francis John Tejano, ti panangpatibker iti permanent prosecution office, panangpasayaat iti case management, suporta kadagiti biktima ken saksi, ken kasapulan iti manpower ken resources.
Nakitaripnong metlaeng ti opisial iti DOJ kadagiti lider a kas kenni Baguio City Mayor Benjamin Magalong, Rep. Mauricio Domogan, ken baro nga CAR OIC Regional Prosecutor Joy Marie Frances Cortez, kadua ti dadduma pay nga opisial iti prosecution offices iti rehion Cordillera.
Ti panangibangon iti opisina ket manamnama a mangitunda iti nasaysayaat, nadalus ken ad-adda nga accessible a hustisia para iti Cordillera communities.
