Mapatta-patta a saan laeng a P27 billion ti mabusbos iti baro a senate building idiay Fort Bonifacio,Taguig.
Daytoy ket kalpasan a kinuna ni Senador Alan Peter Cayetano a developing pay laeng daytoy bayat nga ado pay dagiti dokumento a rumbeng a maadal ken maamoan.
Sigun kenni Cayetano, ti P27 billion a gatad ti baro a senate building ket “conservative” agsipud ta mabalin a manayunan daytoy rason a mabalin a mabigbig daytoy kas kanginaan a pasdek iti pagilian.
Iti sabali a bangir, umap-apela ni Cayetano ken Senator Nancy Binay kasta met iti Senate Coordinating Team (SCT) ken Department of Public Works and Highways (DPWH) nga ibagada ti pudno maipapan iti nasao a proyekto tapno maevaluate a naimbag ti baro a senate building.
Manamnama nga inton Agosto ket mapasamak ti technical decision para iti New Senate Building tapno maadal nu kasano a mabawasan ti kanayunan a gastos para iti daytoy.
Maipalaagip nga idi napalabas a committee meeting ket impakammo ti Department of Public Works and Highways (DPWH) a posible a dumanon iti P27 billion ti gatad a kasapulan para iti nasao a pasdek.
