BAGUIO CITY – Nakemmeg ti maysa a maintenance crew iti drug buy-bust operation nga impatungpal ti PDEA – Cordillera sadiay Abanao St., AZCKO Barangay, Baguio City idi kalman.
Nabigbig daytoy a ni Erwin Reyes Baracas, 32-anyos, baro, tubo ti Las Piñas City ken temporaryo nga agab-abang iti deppaar ti Bokawkan Road.
Nakumpiskar iti ikotna ti dua a sachet a naglaon ti maatap a shabu, P1,000 genuine money, uppat a pidaso ti P1,000 boodle money ken ti cellphone a naaramat iti transaksion.
Naiturong metten ti suspek iti lock-up cell ti PDEA-Cordillera ken sumangsango daytoy iti panaglabsing iti Comprehensive Dangerous Drugs Act of 2002.
Sigun iti PDEA – Cordillera, baro a drug personality ditoy lokalidad ti nasao a suspek gaputa saan daytoy a karaman kadagiti simmuko iti pulisya iti naglabas nga Oplan Tokhang ken Oplan Taphang.
