Naiserbi manen ti baro nga arrest warrant kontra kenni sigud a Bamban, Tarlac Mayor Alice Guo mainaig iti tallo a kaso a panaglabsing iti Republic Act No. 3019, wenno ti Anti-Graft and Corrupt Practices Act.
Napaulog ti warrant iti Pasig Regional Trial Court Branch 67, karaman iti kaso dagiti 11 pay nga indibidual.
Inkeddeng ti korte ti piyansa a P90,000 iti tunggal bilang ti kaso.
Iti agdama, nakabalud ni Guo iti Correctional Institution for Women sadiay Mandaluyong City kalpasan a naduktalan ti korte a nakabasol iti qualified human trafficking ken nasentensiaan iti reclusion perpetua, wenno tungpal biag a pannakaibalud.
Malaksid ken ni Guo, nasentensiaan metlaeng iti tungpal biag a pannakaibalud dagiti kaduana nga akusado a da Rachelle Malonzo Carreon, Jaimielyn Cruz, Walter Wong Rong, Wang Weili, Wuli Dong, Nong Ding Chang, ken Nong Ding Chang.
Naibilin metlaeng dagitoy nga agbayad iti multa a P2 milion iti tunggal kaso.
Malaksid iti dayta, imbilin pay ti korte ti pannakakumpiskar ti P6-billion a Baofu compound, kasta met ti permanente a pannakaikkat ti registration ti Baofu Land Development Inc., Hongsheng Gaming Technology Inc., ken Zun Yuan Technology Inc.
