BAGUIO CITY – Makaaw-awat iti atension iti social media ti ladawan ti lungon a napaskilan ti ‘stay home or stay here’ a naikabil iti quarantine checkpoint ti Itogon Municipal Police Station sadiay Tuding, Itogon, Benguet.
Sigun kenni PMaj. Rommel Sawatang, hepe ti pulisya ti Itogon, inkabilda ti nasao a lungon iti nasao a checkpoint kas psychological approach tapnu maallukoy dagiti residente sadiay nga agtungpal kadagiti protocol ti maipatpatungpal nga Enhanced Community Quarantine.
Kinunana a nagdesisyonda nga aramiden met ti nasao a banag kalpasan a naobserbaranda nga adu latta nga umili ti Itogon ti rumrumwar iti babbalay dagitoy iti baet ti naibilin a home quarantine.
Pagyamyamananna met dagiti maka-apresiar iti nasao nga istratehiya ken mangnamnamada a saan a negatibo ti epekto daytoy kadagiti umili sadiay.
Impetteng ni Maj. Sawatang a ti intension dagiti pulis ti Itogon ket tapnu matulongan ti komunidad nga agtungpal kadagiti maipatpatungpal a protocol ti quarantine tapnu awan kadagitoy ti maakaran iti makapapatay a coronavirus.
