BAGUIO CITY – Agingga ita ket awan pay laeng ti lead ti pulisya iti kinasiasino dagiti suspek a nangbugbog iti maysa a baro a nangitunda iti ipupusay daytoy sadiay Naguilian Road, Baguio City idi kalman.
Nabigbig ti biktima a ni Jomark Anthony Maynigo Lee, 24, ken residente ti Trancoville, Baguio City.
Immunan a nasarakan dagiti mobile patrollers ti Baguio City Police Office ti dara-dara a biktima iti nasao a sidewalk isut gapuna nga intarayda daytoy iti ospital.
Nupay kasta, kalpasan ti sumagmamano nga oras ket pimmusay ti biktima gapu iti Traumatic Brain Injury.
Segun met kadagiti waitresses ti panganan nga asideg iti nakapasamakan ti insidente, kalpasan ti panangirikepda iti establisyemento dagitoy ket nakangegda iti komosyon iti ruar ngem saanda nga inkaskaso.
Iti agdama ket imimbestigaran dagiti pulis ti napasamak nga insidente para iti posible a panakabigbig dagiti suspek.
