BAGUIO CITY – Nag-epekton ti baro a tax reform law ti gobyerno kadagiti paggasolinaan ditoy siudad ti Baguio.
Marikna daytoy iti maikapat a panagngato ti presyo dagiti produkto a petrolyo idi kalman para iti bulan ti Enero.
Iti panagrikos ti Bombo Radyo News Team, na-obserbaran kadagiti paggasolinaan dagiti nakapalkat a paka-ammo a dagitoy ket agtungtungpalen iti Tax Reform for Acceleration and Inclusion (TRAIN) Law.
Impalkatda pay dagiti porsiento a nainayon iti bayadanda a buis tunggal litro iti produkto a petrolyo.
Maibasar kadagiti nasao a paka-ammo, agbalin a P2.97 ti buis ti tunggal litro ti gasolina bayat a P2.80 tunggal litro iti krudo ken P3.36 iti tunggal litro ti kerosena.
Idi agsapa kalman, nanayonan iti 50 centavos ti tunggal litro ti kerosena ken krudo bayat a nanayonan met iti 35 centavos ti tunggal litro ti gasolina.
Magatang ti krudo iti P44 agingga P48 bayat magatang ti gasolina iti P55 agingga P60.
Agtultuloy met ti panangipaay dagiti paggasolinaan iti P1.50 a diskwento iti produkto a petrolyo kadagiti parapasahero a lugan, partikular ti jeep ken taxi.
