Kinompirmar ti Department of Health (DOH) a nailista ti agarup 4,600 a kaso ti human immunodeficiency virus (HIV) iti first quarter ti 2026.
Maibasar iti kaudian a datos manipud iti HIV and AIDS Surveillance of the Philippines, dumanon iti 4,633 ti baru a kaso ti HIV ti nailista manipud Enero agingga Marso.
Sigun iti DOH, buklen daytoy ti 4,381 a lallaki bayat a 252 ti babbai no sadino, agtawen dagitoy iti dua agingga iti 77.
Nangat-ngato daytoy iti 9% no idilig iti kaso a nailista iti kapada a quarter idi napalabas a tawen.
Iti nasao a bilang dagiti baru a kaso, 1,104 wenno 24% kadagiti pasiente ti addaan iti advanced HIV bayat ti pannakadayagnosda.
Nailista ti National Capital Region a kangatuan ti kaso ti HIV a dumanon iti 989; sinaruno ti Calabarzon nga addaan iti 808; Central Luzon nga addaan iti 551; Soccsksargen nga addaan iti 277 ken Davao region nga addaan iti 263.
Kabayatanna, agtultuloy nga idagdagadag ti DOH iti publiko, nangruna dagiti “at risk” nga agpa-test kadagiti certified rapid HIV diagnostic algorithm.
Iti kanito nga ag-positibo, maipaayan dagitoy iti libre a panangpaagas kadagiti accredited HIV treatment hubs iti pagilian.
