Nangipaay iti kondisyon ni Acting Davao City Baste Duterte a nasken nga aramiden ni Philippine National Police Chief General Nicolas Torre III sakbay a mapasamak ti charity boxing match dagitoy.
Sigun kenni Duterte, masapul nga ibaga ni Torre kenni President Ferdinand Marcos Jr. nga ibilinna kadagiti amin a government elected officials nga agpa-hair follicle drug test dagitoy.
Maipalagip nga idi Dominggo ket kinarit ni Duterte ni Torre nga agboksing dagitoy.
Inawat met daytoy ni Torre ken insingasingna pay a pagbalinenda ti labanda kas charity boxing match tapno adda ti maurnong a pundo a maipaay kadagiti naapektaran iti habagat.
Insingasing pay ni Torre a maangay ti labanda iti Rizal Memorial Coliseum idiay Manila inton Dominggo.
Ita laeng nga aldaw ket naipablaak iti social media ti panagsanay ni Torre kas panagsaganana iti naisingasing a charity boxing match.
