Naduktalan a maysa ti basura kadagiti kangrunaan a rason iti panaglayos ti kalsada sadiay Irisan, Baguio City.
Sigun kenni Mayor Benjamin Magalong, impagarupda a ti rason ti pannakapullat dagiti kanal ket gapu iti daga ngem idi naikkat daytoy ket naduktalan dagiti adu a basura a nakaipullat sadiay.
Gapu iti dayta, kinunana a tapno madisiplinaan dagiti umili sadiay ket nasken nga ipangato ti multa nangruna dagiti agibelbelleng iti basura kadagiti creek wenno kadagiti kanal ken kadagiti saan a rumbeng a pangibellengan iti basura.
Naduktalan pay nga adda dagiti agiluklukat kadagiti valve, ken septic tank tapno agibelleng iti danum iti kanal.
Kabayatanna, impakaammo metten ti Department of Public Works and Highways a palawaen dagiti drainage kanal kadagiti kalsada sadiay tapno masolusyonan ti pakaseknan dagiti umili kasta metten dagiti lumablabas a motorista.
