Pinalalakas ng Baguio City Police Office (BCPO) ang pakikipagdayalogo sa mga youth groups, kabilang ang mga street gang, upang mahikayat ang mga kabataan na umiwas sa krimen at makilahok sa mga produktibong gawain.
Ayon kay Mayor Benjamin Magalong, layunin ng programa na matugunan ang agresibong pag-uugali, graffiti, at vandalismo sa lungsod. Siyam na youth groups na ang nakikibahagi sa inisyatiba, kabilang ang UNITY Alliance, na katuwang ng BCPO sa mga programang pangkapayapaan.
Nakiisa rin ang mga miyembro ng youth groups sa paglilinis at pagpipinta ng mga pader na may vandalismo sa Barangay New Lucban, habang inihahanda ng BCPO ang mga oportunidad sa kabuhayan, trabaho, at scholarship para sa kanila.
Pinuri ng National Youth Commission ang hakbang ng lungsod at sinabing makatutulong ito upang mabawasan ang stigma laban sa mga gang at mahikayat ang mga kabataan na maging produktibong bahagi ng komunidad.
