Opisyal a naiyuswat ti Baguio City Police Office ViewBag App(BCPOviewBag App) iti siudad ita nga aldaw.
Gapu iti dayta, mabalin nga idownload daytoy ti publiko kadagiti cellphone-da ngem kadagiti laeng android phone no sadino mabalin nga i-scan ti QR code a naikabil sadiay.
Ti nasao nga application ket inaramid ti Information Technology expert iti nasao nga ahensya a mabalin a makatulong iti publiko ken iti panangpalag-an iti nailet a gunay iti trapiko iti Baguio City.
Iti pannakiuman ti Bombo Radyo kenni PCol. Ruel Tagel, City Director ti Baguio City Police Office, kinunana a maysa a karit a mapaspasaran ti nailet a gunay ti trapiko iti siudad rason a napanunotda daytoy.
Babaen iti BCPOviewBag App, mabalin a makita dagiti user ti traffic situation, tourist destinations, ordinances ken advisories, kasta metten a mabalin a maakses dagiti nagduduma a hotline numbers.
Ti nasao nga application ket naaramid idi pay Disyembre idi napalabas a tawen.
Kabayatanna, iti metlaeng pannakiuman ti Bombo Radyo iti developer iti daytoy ket kinunana nga agarup dua a bulan dagitoy a nangipatungpalda iti experimental tapno makita ti pagpigsaan ken pagkapuyan ti nasao nga app.
Sigun kenkuana, ti nagbalin met a karit dagitoy bayat ti panang-aramidda iti daytoy ket ti realtime information wenno updates iti app .
Nagpalagip metlaeng daytoy iti publiko a kasapulan ti dakkel nga space iti cellphone kasta metten ti internet tapno ma-access ti app.
Makidkidaw met nga nu makapasar man dagiti users ti app ti aniaman a parikut ket mabalin laeng dagitoy nga agkomento iti feedback section.//Bombo Noveh Organo
