Nalayus manen ti Benguet State University Strawberry Farm, sadiay La Trinidad Benguet kagiddan ti napigsa a panagbayakabak ti tudo gapu iti bagyo a Carina.
Maibasar iti monitoring ti La Trinidad Municipal Police station idi kalman Hulio baente tres iti agdama a tawen, nailumlom dagiti mula sadiay kas iti strawberry, green ice ken dadduma pay.
Malaksid iti dayta, ngimmato metlaeng ti lebel ti danum iti Bolo Creek sadiay a posible a mangitunda iti kanayunan a panagngato ti lebel.
Maipalagip a siguden a malaylayos ti strawberry farm tunggal panagbabagyo.
Gapu iti dayta, mapalpalagipan ti publiko nangruna dagiti komunidad a nalaka a maapektaran iti layus bayat ti panagtultuloy ti panagbayakabak ti tudo.
Kabayatanna, mangnamnama met dagiti mannalon a mapapartak ti pannakaaramid ti drainage system tapno saanen a mapasaran ti kapada nga insidente.
Iti agdama ket agtultuloy ti monitoring dagiti maseknan nga opisina tapno matulongan dagiti apektado a mannalon.
