Pabor ni Baguio City Councilor Atty. Edison Bilog iti matartarigagayan a market redevelopment iti City of Pines.
Iti panakiuman iti Bombo Radyo kenkuana, saan a nagbaliw ti takderna seknan iti daytoy ngem impettengna a ti laeng saanna a kanunungan ket ti panakairaman iti pribado a korporasyon iti panakaipatungpal daytoy.
Inlawlawag ni Councilor Bilog a kasapulan a ti lokal a gobyerno iti siudad ti Baguio ti mangidevelop iti nasao a merkado tapno masigurado a ti metlaeng siudad ti Baguio ken dagiti residente ti agnumar iti mapataud daytoy a pamastrekan.
Patien ti opisyal a nu mairaman ti pribado a korporasyon iti nasao a proyekto ket posible a dagiti sabali a lugar iti ruar iti siudad ken iti rehion ti agnumar iti daytoy.
Impettengna a ti Baguio City Market ket para iti siudad iti Baguio ken kadagiti residente daytoy.// Bombo RobDominguez
