Impakaamo ti Bureau of Immigration (BI) a mangipilada ti kaso kontra kadagiti indibidual a mapaneknekan a “guilty” wenno nakabasol iti panangsalbar ken panangsalaknib kadagiti ganggannaet nga espia iti pagilian.
Sigun kenni Commissioner Joel Viado, makikikoordinaren ti Bureau of Immigration (BI) iti Department of Justice (DOJ) tapno makaalada ti impormasion maipapan kadagiti lima a Chinese nationals a nakemmeg gapu iti maatap a pakainaiganda iti panangespia ti Philippine Navy ken Coast Guard assets idiay Palawan.
Kinuna ni Viado a naiparangarang iti inisial nga imbestigasion dagiti ganggannaet nga addaan iti regular immigration status dagitoy iti Pilipinas.
Kinunana pay a makitintinnulongda iti National Bureau of Investigation (NBI) tapno maammuan no adda dagiti indibidual a timmulong kadagiti suspek iti maatap nga iligal nga aktibidadda.
Itay laeng nabiit, inyebkas ni President Ferdinand “Bongbong” Marcos Jr. ti pakaseknanna iti insidente a napasamak, ken ur-urayenna laengen ti kanayunan a detalye iti mapapati nga aktibidad ken naamuanna pay a sumagmamano kadagitoy ket nabayag iti Pilipinas.
Maipalagip a nakemmeg ti NBI dagiti gangannaet a maatap a suspek iti panagespia kadagiti kameng ti Philippine Navy ken Coast Guard.
