BAGUIO CITY – Maisaksakad ti ordinansa para iti panakaisayangkat ti Bicycle Festival iti munisipyo ti La Trinidad, Benguet.
Sigun kenni Councilor Guiller Galwan, awtor ti singasing nga ordinansa, panggepda nga ital-o ti panaka-aramat dagiti non-motorized vehicles kas iti bisikleta tapnu makasayan ti mapaspasaran a nailet a taray ti trapiko iti masakupan ti munisipyo.
Inlawlawagna a nakalanad iti singasing nga ordinansa a kasapulan a mangilatang dagiti dadakkel nga establishimento sadiay iti pagparadaan dagiti bisikleta.
Kinunana a panggepda met laeng a makipatang iti traffic management board para iti implementasyon ti Bike Lane Zone nga inaprobaran ti konseho idi napalabas a tawen.
Innayonna a napintas met laeng ti nasao a panggep kagiddan iti implementasyon ti Carless Day iti munisipyo iti tunggal aldaw ti Huebes.