Pimmusay ti biktima ken ti suspek iti napasamak a baro manen a shooting incident sadiay Brgy. Nagtupacan, Lagangilang, Abra, oras ti 6:50 idi April 07, 2025.
Nabigbig ti biktima a ni Kapitan Lou Salvador Claro, agtawen iti 57, retired a pulis, naasawaan ken residente iti nadakamat a lugar.
Ti suspek met ket nabigbig a ni Manzano Bersalona Agdalpen Jr., agtawen iti 58, addaan live in partner, kandidato para iti konsehal ken residente met laeng iti Nagtupacan Lagangilang, Abra.
Maibasar iti inisyal nga imbestigasyon dagiti otoridad, bayat ti panagkampania ti maysa a grupo dagiti kandidato, maysa a lalaki a nabigbig a ni Rommel Apolinar ti nakatakder iti asideg ti lugar idi kellaat a dinanog ni Sanggunian Bayan candidate Manzano Bersalona Agdalpen Jr., iti nasao a team iti rupana.
Dagus met a nagturong ni Apolinar iti ayan ni Claro tapno kitaen ti sitwasyon daytoy ngem nairaman pay a nadanog ti rupa daytoy.
Ditoy metten nga induron ni Agdalpen ni Claro ken inasutna ti paltogna sakbayna nga imputok kenni Claro iti namin adu a daras.
Nupay kasta, napaltogan met ni Agdalpen ngem saan pay a nabigbig ti suspek.
Naitaray ni Claro iti Seares Hospital para iti medikal a pannakaagasna ngem indeklara ti attending physician a pimmusay daytoy bayat a naitaray met ni Agdalpen iti Abra Provincial Hospital ngem indeklara metlaeng ti attending physician a ni Dr. Felino Burgos a dead on arrival daytoy.
