BAGUIO CITY – Saanen a makaskastrek iti trabaho ti dadduma nga OFWs sadiay Iraq gapu iti lockdown sadiay a resulta ti COVID-19 pandemic ken agtultuloy a riribok a mapaspasaran iti dadduma a lugar sadiay.
Iti eksklusibo nga interbyu ti Bombo Radyo Baguio ken ni Chargè d’Affaires Jomar Sadie ti Philippine Embassy sadiay Baghdad, Iraq, kinunana nga adun a Pinoy sadiay ti saan a makastrek iti trabaho gapu kadagiti nasao a parikot.
Dinakamatna a 68 nga OFWs sadiay ti apektado iti “no work, no pay” ken mapagam-amkan a mapukawan iti trabaho ti dadduma pay kasaruno ti panagbaba ti presio ti lana a maysa kadagiti kangrunaan a produkto ti Iraq.
Kinunana nga awan pay met ti naipadamag a Pinoy a nagpositibo iti COVID 19 sadiay Iraq ngem nu adda man ket ibaklay ti gobierno ti Iraq ti amin a magastos iti panagpaagas dagitoy.
Sigun kenkuana, maipaspasidong iti istrikto a quarantine protocols dagiti Pinoy nga agkamkamang iti embahada kas kadagiti binugbog dagiti amoda.
Innayon pay ni Sadie a dumanonen iti nasurok 1,800 dagiti positibo a kaso ti COVID 19 bayat a nasurok 1,043 dagiti naimbagan ken nasurok 82 dagiti pimmusay gapu iti nasao a sakit sadiay Iraq.
