BAGUIO CITY – Nanayonan ti bilang dagiti barangay iti rehion Cordillera a naideklara manen a drug-affected.
Iti panakiyuman ti Bombo Radyo kenni Atty. Joseph Frederick Calulut, public information officer ti PDEA-Cordillera, kinunana a daytoy ket gaputa nagsubli iti sigud nga iligal nga aramid ti sumagmamano a residente kadagiti nasao a barangay wenno saan ket adda dagiti baro a residente a nairaman iti transaksion ti iligal a droga.
Kinunana nga adda dagiti barangay a sinuratan ti Regional Oversight Committee para iti panaka-aksion ti timmaud a parikut iti masakupanda seknan iti iligal a droga ngem awan ti nagbalin nga aksion iti nasao a surat.
Sigun kenkuana, daytoy ti maysa pay a rason no apay a naideklara dagiti nasuratan a barangay a drug-affected.
Nupay kasta, impeksa ni Atty. Calulut a nainget latta ti panangipatungpal ti PDEA-Cordillera ken ti Drug Enforcement Unit ti Cordillera PNP iti kampanya kontra iti iligal a droga.
Mangnamnama met ti Regional Oversight Committee a kadagiti masungad nga aldaw ket madalusan manen manipud iti iligal a droga dagiti barangay iti rehion a naideklara a drug-affected.
Kabayatanna, dinakamatna nga iti agdama ket awan ti namonitorda a drug-affected a barangay sadiay Mt. Province ken Ifugao bayat nga adda dagiti naideklara a drug-affected barangay iti Kalinga, Abra, Benguet ken Baguio City.
