BAGUIO CITY- Bimmaba ti bilang dagiti benipisaryo ti Pantawid Pamilyang Pilipino Program (4Ps) ditoy rehion Cordillera.
Iti panakiyuman ti Bombo Radyo, kinuna ni 4Ps Regional Program Coordinator Fatima Florendo a manipud iti 62, 880 households a benipisaryo ti 4Ps idi napalabas a tawen ket nagbalinen dagitoy a 62, 336 households kas maibasar iti kaudian a datusda idi April 30.
Kinunana a ti 60,000 kadagitoy ket benipisaryo iti sidong ti regular conditional cash transfer program bayat a ti 2,336 ket benipisaryo iti sidong ti modified conditional cash transfer program.
Sigun kenkuana, 60 percent kadagitoy ket addaan iti cash cards bayat a ti nabatbati a 40 percent ket over the counter wenno dagiti maipapaayan ti cash.
Innayonna a sumagmamano kadagiti naikkat iti programa ket dagiti exited households bayat a dagiti dadduma ket naikkat gapu iti panaglabsingda iti kondisyon ti programa.
