BAGUIO CITY – Nanayonan manen ti bilang dagiti drug-affected a babbarangay ditoy rehion Cordillera.
Sigun kenni Philippine Drug Enforcement Agency (PDEA) – Cordillera information officer Atty. Joseph Frederick Calulut, mapattapatta a dumanon iti 47 a babbarangay iti rehion ti apektado iti iligal a droga.
Inlawlawagna a daytoy ket gaputa nagtalinaed ti koneksion ti dadduma nga opisyal dagiti barangay iti iligal a droga.
Kinunana a tarigagay ti PDEA-Cordillera a maideklara manen a drug-cleared dagiti nasao a babbarangay babaen iti pannakitinnulong dagiti barangay officials.
Immapela pay daytoy kadagiti mabotosan iti masungad nga eleksion a tutukanda ti drug-clearing kadagiti masakupan dagitoy a barangay.
Kabayatanna, impannakkel ni Atty. Calulut nga amin a barangay iti rehion ket addaan iti bukod a Barangay Anti-Drug Abuse Council (BADAC).
Nupay kasta, kinunana a saan a siento porsiento nga agtigtignay dagiti kameng ti BADAC isut gapuna a maysa daytoy iti kangrunaan a tutukan ti PDEA.
