BAGUIO CITY – Naklaat ti ama ti Baguio kalpasan a naipadamag a nanayonan ti bilang dagiti drug-affected barangays ti siudad ita a tawen.
Maibasar iti datus ti Regional Oversight Committee on Illegal Drugs nga idadauluan ti PDEA-Cordillera ken ti Dangerous Drug Board, pakabuklan ita a 24 ti bilang dagiti barangay iti Baguio nga apektado iti iligal a droga manipud iti nabatbati nga 18 a barangay napalabas a tawen.
Gapu iti daytoy, kinuna ni Mayor Mauricio Domogan a kiniddawnan ti panakikoordinar ti Baguio City Police Office iti PDEA-Cordillera tapnu ammuenda dagiti rason no apay a nagsubli a drug-affected dagiti nasao a babbarangay.
Impettengna pay a dakkel ti akem dagiti baro a nabotosan a barangay officials iti panakadalos dagiti babbarangayda nga apektado pay laeng iti iligal a droga babaen iti panakitinnulongda kadagiti otoridad.
Immuna iti daytoy, impeksa ni PSSupt. Ramil Saculles, dadaulo ti Baguio City PNP nga agtultuloy ti kampanyada kontra iti iligal a droga ken ita a tawen ket siyam a drug personalities ti nakemmegda bayat a 52 nga indibidual ti simmuko a bukbuklen ti 14 nga identified drug pushers ken 38 a drug users.
Naamuan nga innem a barangay ti nailista kas moderately drug-affected iti siudad.
