BAGUIO CITY – Dumanon ita iti nasurok 462,300 nga estudyante iti elementray ken sekondarya ti nag-enroll para iti blended learning ti School Year 2021-2022 iti rehiyon Cordillera.
Sigun kenni DepEd-Cordillera Regional Director Estella Cariño, angatngato daytoy no idilig iti nasurok 435,000 nga enrollees iti napalabas nga School Year 2020-2021.
Maipalagip a naiyemplementar ti blended learning iti pagilian kasukat ti face-to-face classes gapu iti agdama a COVID-19 pandemic.
Kinunana a maur-uray pay ti panag-enroll dagiti dadduma nga estudyante manipod iti napalabas nga school year ken dagiti dadduma a saan a nag-enroll gaputa ury-urayen dagitoy ti panagsubli ti face-to-face classes.
Mabalin nga agawat ti DepEd-Cordillera kadagiti late enrollees agingga iti ngudo ti agdama a bulan ti September.
Inlawlawag met ni Cariño a nupay blended learning ti wagas ti panagadal dagiti estudyante gapu iti pandemya, maimatangan wenno makita latta met dagiti estudyante dagiti mannursuro dagitoy babaen ti online.
