Dumanonen iti 95 nga indibidual ti pimmusay bayat nga agarop 130 dagiti nadangran gapu iti magnitude 6.8 a nginggined idiay Tibet, China a nangapiktar kadagiti kabangibang a lugar daytoy kas iti Nepal, Bhutan ken India.
Napasamak ti ginggined iti pasado alas nuebe ti agsapa nga addaan iti kaunneg a 10 km (6.2 miles) sigun iti China Earthquake Networks Center.
Ti sentro ti epicenter ket idiay Tingri nga asideg ti beddeng a nagdinnungparan ti Indian tectonic plate ken Eurasian plate a nangitunda iti fault-lines iti Tibetan plateau.
Naapektaran pay dagiti abagatan a laud a paset ti China, Nepal ken amianan nga India gapu kadagiti ginggined a gapuanan ti panagdinnungpar dagiti tectonic plates ti India ken Eurasian.
Kinuna ni Chinese President Xi Jinping a rumbeng a maaramid ti all-out search ken rescue efforts tapno maksayan ti casualties, matulungan dagiti naapektaran a tattao, ken masigurado ti kintalged ti publiko nangruna iti kinalam-ek ti temperatura sadiay.
Mainaig iti dayta, nasurok 1,500 a lokal a bombero ken rescue workers ti naibaon kadagiti naapektaran a lugar.
Malaksid iti dayta, agarup 22,000 a cotton tents, cotton coats, quilts ken folding beds ti naipatulod kadagiti naapektaran a rehion.
