Dumanonen iti tallo pulo ket maysa (31) nga indibidual ti bilang dagiti politiko a nangipila iti kandidaturada para iti 2025 National ken local elections manipud iti umuna nga aldaw ti filing of Certificate of candidacy agingga ita nga aldaw.
Iti panakiuman ti Bombo Radyo kenni Atty. John Paul Martin, Commission on Elections (COMELEC) Officer iti siudad ti Baguio, kinunana a sangapulo ket walo a kandidato ti nangipila iti kandidaturada ita nga aldaw.
Daytoy ket buklen da Gladys Vergara a tumaray iti kinakongresista; Incumbent Congressman Mark Go kas Mayor; Incumbent Baguio City Councilor Mylen Yaranon iti kina bise-mayor ken dagiti nabatbati a sangapulo ket lima nga indibidual ket tumaray iti kina-councilor.
Maibasar iti kaudian a datos ti Commission on Elections-Baguio, kinuna ni Martin a dumanonen iti uppat ti nangipila iti Certificate of candidacyda iti kinakongresista bayat a maysa pay laeng ti nangipila iti kandidaturana iti kina-mayor ken bise-mayor.
Ado met a netizens iti naklaat iti panagtamdem da Congressman Mark Go ken ti asawa daytoy a ni Sol Go inton sumaruno nga eleksyon.
Nu pay kasta, kinuna ni Martin a mabalin daytoy gapu ta awan ti prohibition iti nasao a banag kasta met a mabalin nga agkakapamilya ti agtaray para iti eleksyon.
Kabayatanna, manamnama nga inton bigat ket dua a partido ti agipila iti kandidaturada, maysa a partido iti agsapa ken maysa a partido iti malem.
