BAGUIO CITY – Panggep ti COMELEC-Baguio nga inton sumaruno a bulan ti Disyembre ket innaldaw a 100 nga indibidual wenno kliyente ti akomodarenda.
Inwaragawag daytoy ni City Election Officer Atty. John Paul Martin iti panakiyuman ti Bombo Radyo Baguio kenkuana.
Kinunana a kadagiti napalpalabas a lawas ket adu dagiti nagturturong iti opisinada tapnu agparehistro, agala ti voter’s certification ken dadduma pay a transaksion.
Dinakamatna a manipud iti 50 a kliyente iti innaldaw ket nagbalinen a 75 a kliyente iti innaldaw ti ak-akomodaren dagitoy ita a bulan.
Imbingayna pay nga adu met dagiti agap-aplikar tapnu maiyakar ditoy siudad ti pagbotosanda manipud iti nagtaudanda a probinsia wenno munisipyo.
Inlawlawag ni Atty. Martin a posible nga epekto daytoy ti agdama a pandemya.
Nalakukat ti opisina ti COMELEC-Baguio manipud Lunes agingga Huwebes a mangakomodar kadagiti kliyente daytoy.
