BAGUIO CITY – Nagbalinen a lima ti bilang dagiti nabiktima iti paputok ditoy rehion Cordillera ita a holiday season.
Iti panakipatang ti Bombo Radyo kenni Clark Dizon, Health Emergency Management Staff Coordinator ti Department of Health (DOH) – Cordillera, kinunana nga iti opisyal a datusda ket uppat a kaso ti firecracker-related injuries ti nairekord iti rehion.
Kinunana a dua kadagitoy ti nailista sadiay Kalinga ken saggaysa iti Benguet ken Ifugao.
Innayonna a dagiti biktima a mismo ti nangsindi iti paputok a nakadangran metlaeng dagitoy.
Immunan a naipadamag a maysa a 9-anyos ti naputukan iti piccolo sadiay Ifugao; maysa a 12-anyos ti naputukan ti piccolo sadiay Benguet; maysa a 9-anyos ti naputokan ti improvised toy gun a naglaon ti pulbura sadiay Kalinga ken maysa nga Army trooper ti naputukan iti pla-pla sadiay Kalinga.
Nupay kasta, naamuan kenni Dr. Donabel Tubera, dadaulo ti Epidemiology and Surveillance Unit ti City Health Services Office nga adda ti maysa nga 18-anyos a lalaki a nabiktima iti piccolo ditoy siudad ti Baguio.
Dinakamatna a nadangran ti kikit ti kanawan nga ima ti biktima kalpasan a naputokan daytoy iti piccolo.
Gapu iti daytoy, agtultuloy ti nainget a panagmonitor ti DOH-Cordillera iti nagduduma a probinsya ditoy rehiyon ita a holiday season nangruna ti panaka-aramat iti paputok.
