BAGUIO CITY – Bimmaba ti bilang dagiti nagbotos iti Barangay election bayat a ngimmato met ti bilang dagiti nagbotos iti Sangguniang Kabataan Election iti Baguio City idi Oktobre 30.
Iti interview ti Bombo Radyo kenni Atty. John Paul Martin, Election Officer ti Commission on Elections (COMELEC) – Baguio, 53.01% kadagiti rehistrado a botante ti nagbotos iti kaleppas a barangay election nu idilig iti 62.58% idi 2018.
Dumanon met iti 49.52% a rehistrado a botante ti nagbotos iti kaleppas a Sangguniang Kabataan Election, nangatngato nu idilig iti 43% idi 2018.
Dinakamat ni Atty. Martin a maysa kadagiti rason iti panagbaba ti bilang dagiti nagbotos ket naitsamba ti eleksyon iti long weekend nu sadino ginundawayan dagiti umili nga agbakasyon kadwada ti pamilyada.
Kabayatanna, manamnama a maipalpas ita nga aldaw ti pannakaipaay ti honoraria dagiti amin mannursuro a nagserbi iti Barangay ken Sangguniang Kabataan Elections.
Impalagip met ni Atty. Martin kadagiti kandidato nga isumiterda ti Statements of Contributions and Expenditures (SOCE) dagitoy agingga inton Nobyembre 29 sakbayda a mabalin nga agtugaw iti masakupanda a barangay.//Bombo Rosemarie Bulsao
