BAGUIO CITY – Bimmaba ti bilang dagiti napasamak nga index crimes wenno focus crimes ditoy siudad ti Baguio bayat a ngimmato dagiti non-index crimes manipud Enero agingga Abril, 2018.
Sigun kenni PSSupt. Ramil Saculles, city director ti Baguio City Police Office (BCPO), nakailistada iti pakabuklan a 194 index crimes kadagiti nasao a bulan manipod iti 1,361 nga index crimes kadagiti kapada a panawen idi napalabas a tawen.
Kinunana a katukad daytoy ti 54 a porsiento nga adayo a nababbaba no idilig iti national rate a 18 a porsiento a panagbaba iti bilang ti index crimes iti entero a pagilian kadagiti kapada a bulan.
Dinakamatna a karaman kadagiti nasao nga index crimes ket ti kaso ti panagtakaw, panangdangran, panag-carnap ken ti panagrames.
Innayonna a ti kaso a panagrames ket bimmaba iti 58 a porsiento.
Nupay kasta, nalidayan daytoy gaputa ngimmato met dagiti nailistada a non-index crimes iti 86 a porsiento, partikular ti nagsasaruno a vehicular traffic accidents.
Sigun iti PNP, dagiti index crimes ket dagiti krimen kontra iti indibidual wenno tao kas iti pammapatay, panangdangran ken panagrames ken dagiti krimen kontra iti sanikua kas iti panagtakaw, panag-carnap wenno carjack ken cattle rustling bayat a dagiti non-index crimes ket dagiti panaglabsing kadagiti special laws such kas iti iligal a panagpukan ti kayo ken dagiti lokal nga ordinansa.
