BAGUIO CITY – Dumanonen iti 17,199 a pamilya a bukbuklen ti nasurok 66,000 nga indibidual ti bilang dagiti naapektaran iti rehion Cordillera gapu iti epekto ti agdama a nepnep.
Iti kaudian a report ti Cordillera Regional DRRM Council, 3 a pamilya wenno 14 nga indibidual ti adda ita kadagiti evacuation centers bayat a 242 a pamilya wenno nasurok 1,000 nga indibidual ti nagkamang kadagiti kabagian wenno kaaruba dagitoy.
Naipaayanen dagitoy iti kaskenan a tulong manipud iti DSWD-Cordillera a dumanon ti nasurok P947-K ken manipud kadagiti maseknan a lokal a gobyerno a dumanon ti nasurok P926-K.
Dumanon metten iti 124 dagiti partially-damaged a babbalay bayat a 10 ti naan-anay a nadadael ken agtaltalinaed a dua nga indibidual ti mapukpukaw.
Iti alas-nuebe idi agsapa ket lima a gate ti Ambuklao Dam ti nailukat bayat nga uppat a gate ti Binga Dam ti nailukat gapu iti agtultuloy a panagngato ti lebel ti danum kadagitoy.
Iti met report ti DPWH-Cordillera, 23 a road section ti one-lane passable bayat a maysa a road section ti nairikep.
Imballaag metten ti Cordillera RDRRM Council ti panagridam dagiti agnanaed kadagiti landslide prone areas gapu iti dakkel a posibilidad ti panagreggaay kasaruno ti nakaron a saturation iti daga gapu iti awan sarday a panagbayakabak ti napigsa a tudo.
