BAGUIO CITY – Agtultuloy ti panagturong dagiti dadduma a turista iti Mt. Ulap sadiay Barangay Ampucao a maysa metlaeng kadagiti kangrunaan a potential tourism sites iti munisipyo ti Itogon, Benguet.
Nupay kasta, kinuna ni Municipal Tourism Action Officer Nesto Camado Jr. nga ita a bulan ket fully booked ti Mt. Ulap gaputa adon dagiti nagpareserba iti panagsang-atda iti nasao a bantay.
Inlawlawagna nga iti agdama ket nalimitaran iti innem a gasut nga indibidual ti mapalubusan a sumang-at iti nasao a bantay iti innaldaw tapnu mamantinir ti kinadalos ti aglawlaw ti bantay.
Kagiddan iti daytoy, ad-adalen ita ti lokal a konseho ti Itogon, Benguet ti ordinansa para iti panagsingir dagitoy iti “fixed” nga environmental fee ken tour giude fee para kadagiti sumang-at iti nasao a bantay.
Impanamnamana met nga agtaltalinaed a natalged dagiti tourism destinations dagitoy babaen iti panakikoordinarda iti Itogon Municipal Police Station.
