BAGUIO CITY – Impetteng ti presidente ti maysa taxi drivers association ditoy rehion Cordillera nga adu dagiti taxi drivers nga agbibiahe ita a holiday season.
Reaksion daytoy ni James Bolinao iti adu a reklamo ita dagiti umili ditoy lokalidad a marigatanda a maka-ala ti taxi gapu iti kinakurang dagitoy.
Iti panakipatang ti Bombo Radyo kenkuana, kinunana nga agbibiahe amin dagiti kaaduan a taxi ngem iti kaadu dagiti turista ket immilet ti trapiko a pakaip-ipitan dagiti taxi.
Innayonna nga iti kaadu dagiti turista ket adu met dagiti taxi a naka-on tour wenno dagitoy dagiti naarkila a mangipasyar kadagiti turista iti nagduduma a tourist spots ditoy siudad.
Inaklonna met nga iti sitwasyon ita a holiday season ket maibaga a kurang ti bilang dagiti taxi nga agbibiahe iti lokalidad ngem no iti regular season wenno awanen ti nailet unay a trapiko ket awan ti parikut iti transpot sector, nangruna iti benneg dagitoy.
Kabayatanna, irekrekomendar ti grupoda ti panakailaksid dagiti parapubliko a lugan manipud iti implementasyon ti number coding scheme ken dagiti laeng pribado a lugan ti maipaayan iti nasao a banag.
Impalawag ni Bolinao a babaen iti nasao nga addang ket lumawa ti kalsada ken makabiahe dagiti parapubliko a lugan a mangakomodar kadagiti adu a pasahero.
Inaklonna nga iti panag-ilet unay ti trapiko ita a holiday season gapu iti kaadu unay dagiti lugan iti lokalidad ket adda dagiti taxi drivers nga aggarahe laengen.
Kinunana a no pilitenda nga agbiahe ket sayang ti gastos iti krudo ken malugida gaputa saanda a madanun ti boundary dagitoy gaputa saanda a maragpat ti bilang dagiti biahe ken pasahero a kasapulanda iti tunggal aldaw.
Imbingayna pay a nangraugi ti panagadu dagiti turista ken dagiti lugan ditoy lokalidad iti December 23 ken manamnama a mapasaran manen ti kapada a sitwasyon iti kanito a marambakan ti Panagbenga inton Pebrero ti sumaruno a tawen.
