BAGUIO CITY – Umad-ado ita dagiti indibidual, pakairamanan dagiti overseas Filipino workers (OFWs) nga agpabpabakuna kontra iti polio iti opisina ti Bureau of Quarantine (BOQ) sadiay Manila.
Sigun kenni BOQ director Ferdinand Salcedo, daytoy ket kalpasan nga ikalkalikagum ita dagiti 19 a pagilian ti panagsumitir dagiti agtataud kadagiti nasyon nga addaan kaso ti polio iti vaccination certificate.
Kinunana a killaat nga immado dagiti indibidual nga agpapabakuna kadakuada kontra iti polio.
Dinakamatna a kaaduan nga agpabpabakuna ket dagiti OFWs nga agturturong sadiay Brunei, Georgia, Maldives, Morocco, Oman, Qatar, Lebanon, Pakistan, Seychelles ken Indonesia.
Innayon ni Salcedo a saan a makastrek kadagiti nasao a pagilian dagiti indibidual a nagtaud kadagiti pagilian nga addaan kaso ti polio kas iti Pilipinas no awanan dagitoy iti maikalkalikagum a sertipikasyon.
