Nagdoble ti bilang dagiti turista a bimmisita iti munisipyo ti Atok idi napalabas a bulan no idilig iti kapada a bulan idi tawen 2024.
Daytoy ket kas maibasar iti datos ti Atok Tourism Office no sadino manipud iti agarup 17-K a bilang dagiti turista a nailista idi Enero 2024 ket nagbalin daytoy nga agarup 21-K a bilang idi napalabas a bulan.
Iti panakiuman ti Bombo Radyo kenni Johanna Mae Lopez- Balao, Tourism officer I, kinunana a mas ado ti bilang dagiti turista a sumangsangbay ita a tawen no idilig idi napalpalabas a tawen.
Daytoy ket gapu kadagiti nagduduma a tourist destination a mapasyar iti nasao a munisipyo.
Sigun kenni Lopez- Balao, para ita a tawen, panggep dagitoy a makailista iti agarup 200-K a bilang dagiti turista.
Maibasar pay iti datos iti Atok Municipal Tourism, agarup triple ti nagdur-asan ti bilang dagiti turista a simmangbay idi napalabas a tawen a dumanon iti agarup 165-K a katao no idilig iti agarup 61-K a katao idi tawen 2023.
