Bimmaba ti bilang dagiti turista a simmangbay idiay La Trinidad, Benguet, a nakaapektar iti pammastrekan dagiti lokal a negosio bayat nga agtultuloy a mangpakpakapsot iti panagbiahe ti panagngato iti presio iti krudo.
Sigun kenni La Trinidad Mayor Roderick Awingan, nadlawda a bimmaba ti tourist arrival iti masakupanna a munisipyu nangruna ta ngimmato presio iti krudo.
Narikna metlaeng dagiti mannalon ti epekto daytoy iti strawberry farm, nu sadinno kadawyan a dumaydayo dagiti turista iti strawberry picking.
Iti baet daytoy, adda met latta dagiti turista ti bimmisita idiay La Trinidad, Benguet ken ginundawayanda ti atidog a weekend.
Kabayatanna, nailukat iti publiko itay laeng kallabes ti maysa a baro a tourist attraction idiay La Trinidad nga addaan iti nasurok 20,000 a mula a rosas, a nasayaat para kadagiti kayatna nga agpaala iti ladawan.
Maimatangan iti hardin ti nasurok sangagasut a kita iti rosas, karaman ti Catalina rose, ken mabalin metlaeng a maimatangan ti nalawa a napintas a buya ti La Trinidad, Benguet, kadua ti dadduma pay a pagmulaan iti sabong.
