Agtultuloy a manaynayunan dagiti agkamkamang nga ubbing a babbai nga agtawen ti sangapulo ket dua agingga sangapulo ket tallo iti Philippine National Police tapno ibutaktak nu kasano dagitoy nga inabuso ni Pastor Apollo Quiboloy, ti dadaulo ti simbaan a Kingdom of Jesus Christ.
Daytoy ket sigun kenni Col. Jean Fajardo, pannakangiwat ti Philippine National Police.
Iti statement ti maysa a biktima, kalpasan ti mapapati a panaggaraw ni Pastor Quiboloy kadagiti ubbing ket kinunana nga agtaltalinaed latta a “pure” wenno “intact” paylaeng ti kinababae dagitoy gaputa nakinaigda iti espiriu ti Diyos.
Binutbuteng metlaeng ni Quiboloy dagiti biktima nga iti kanito nga agreklamoda ket suruten kano ti aw-awaganda nga “Angels of death.”
Sigun kadagiti ubbing, ammu dagiti nagannak a miembro ti simbaan ti Kingdom of Jesus Christ (KOJC) ti panagabuso iti nasao a pastor.
Kabayatanna, impasigurado ti Philippine National Police (PNP) a posible a mapilaan metlaeng ti reklamo dagiti nagannak wenno miembro ti nasao a simbaan iti kanito a mapaneknekan nga indatonda dagiti menor de edad nga annakda tapno makinaig kenni Apollo Quiboloy.
Sigun pay iti maysa a biktima a nagkamang kadagiti kameng ti pulisia, ti panangitulok dagiti nagannak a makinaig ket agserbi kano kas dalan tapno makadanon iti langit gaputa patienda a panagtulnog iti Diyos.
