Bimmaba iti 56% ti bilang iti insidente iti uram iti siudad ti Baguio manipod Enero agingga Mayo 13 iti agdama a tawen, sigun iti Baguio City Fire Station.
Kinuna ni Mark Anthony Dangatan, fire marshal iti Baguio City, a duapulo ket dua nga insidente iti uram ti nailista iti agdama a tawen nu idilig iti 39 idi kapada a panawen idi tawen 2024.
Nupay kasta, nangatngato ti gatad iti nadadael iti agdama a tawen a dumanon iti P16.2 milion nu idilig iti P10.7 milyon idi napalabas a tawen.
Nailista metlaeng ti maysa a pimmusay ken tallo a nadangran iti nagsina nga insidente iti uram.
Iti datos, immuna ti residential fires kadagiti nailista a kaso iti agdama a tawen nga addaan iti 13 kasaruno ti non-residential ken grass fires nga addaan iti sag-uppat, ken maysa a forest fire.
Ginuyugoy ni Dangatan ti publiko nga agbalin a naridam tapno maliklikan ti uram, karaman ti panagbantay iti mailutluto ken saan a panagay-ayam iti posporo kadagiti ubbing.
