Dumanon iti 10,538 ti nakarehistro a botante idiay Kibungan, Benguet, kas maibasar iti datos ti Commission on Elections-Kibungan.
Iti pannakiuman iti Bombo Radyo kenni Abelardo Lindawan Jr., Election Officer ti Comelec-Kibungan, kinunana a manipod idi Oktubre idi napalabas a tawen agingga idi Mayo 18 ket nakailistada iti 491 nga aplikante a nagparehistro.
Iti baet nga adu ti nagparehistro, impetteng ni Lindawan nga ad-adu dagiti nadeactivate a botante iti nasao a munisipyo.
Kabayatanna, imbinglay ti opisial a maysa a karit a sangsangwenda iti nasao a lugar ket ti kinaawan iti opisial iti Sanguniang Kabataan.
Gapu iti dayta, al-allukoyenna dagiti agtutubo a makipartisipar inton umay nga eleksion.
Iti sabali a bangir, impeksana a nakasagana ti opisina para iti eleksion gaputa addan dagiti nakaplano a panagtaripnong iti nagduduma nga ahensia, lokal a gobierno, ken barangay.
Innayonna pay a silulukat ti opisinada kagiddan ti panangibagan a mabalin a mangipaay iti mensahe iti official facebook page dagitoy para kadagiti kanayunan a damag seknan iti panangipila iti kandidaturada.|via Khey Reparip
