Bimmaba ti bilang dagiti aplikasyon para iti voter registration idiay Kapangan, Benguet nu idilig kadagiti naglabas a tawen a posible a gaputa kaaduan kadagiti kwalipikado a botante ket rehistrado metten.
Iti pannakiuman iti Bombo Radyo kenni Mabel Domingo Villaroman, Election Officer iti Kapangan, Benguet, ti naisayangkat nga Election Registration Board (ERB) idi Enero 19, 2026 ket dimmanon laeng iti 128 ti naaprobaran, bayat a ti maisayangkat nga ERB ita nga aldaw ket adda ti nairekord a pakabuklan a 146 a transaksion.
Innayonna pay a nu mairaman iti amin dagiti naaprobaran manipod iti kaudian a bilang, dumanon iti 14,679 ti regular voters idiay Kapangan a buklen iti 15 barangay.
Kabayatanna, palpalagipan metlaeng ni Villaroman dagiti agsagsagana a tumaray iti umadanin nga eleksion a sapaen ti panangi-apan iti COC tapno maliklikan ti aberia, ken maipasigurado a kompleto dagiti requirements.
Nagyaman met ni Villaroman iti amin iti panagtulong kadakuada iti maisaysayangkat a satellite registration iti nagduduma a barangay ken ginuyugoyna metlaeng dagiti nakarehistro a botante nga aramaten ti karbenganda nga agbotos iti panagdanon iti eleksion.
