Posible a mangipatungpal ti City Health Services Offices (CHSO) iti libre a vaccination para kadagiti maladaga iti siyudad ti Baguio maminsan iti binulan tunggal aldaw ti Sabado.
Iti panakiuman ti Bombo Radyo kenni Sonia Insas, Nurse V iti CHSO, nagkiddaw ti maysa a barangay captain iti siyudad a no mabalin ket adda kuma ti maipatungpal a libre a vaccination tunggal weekends gapu ta adu dagiti working parents a saan a makaiapan kadagiti annakda sadiay Brgy. Health Centers tunggal weekdays tapno ipabakuna dagitoy.
Gapu iti dayta, naibinglay ni Insas nga adalenda pay a nalaing ti nasao a singasing.
Nakunana pay a ti naipatungpal a libre a bakuna para kadagiti 6 weeks to 1 year and 29 days old sadiay opisina ti CHSO iti siyudad ti Baguio ita nga aldaw, April 26, 2025 ket parte ti World Immunization Day ken saan a binulan nga aktibidad ti CHSO.
Maipalagip a nagleppas ti pannakaipaay dagiti libre a bakuna itay alas dose ti pangaldaw nu sadino naidiaya dagiti nagduduma a bakuna a pakairamanan ti Pentavalent vaccine, Oral Polio Vaccine/Inactivated Polio Vaccine, Pneumococcal Conjugate Vaccine, ken Measles, Mumps, Rubella Vaccine.//Bombo Genzel Depayso
