Temporaryo nga agtakem kas acting president iti Venezuela ti bise presidente daytoy a ni Delcy Rodríguez kasaruno ti panangarestar iti pwersa militar iti Estados Unidos kenni Venezuela President Nicolás Maduro idi Sabado.
Sigun iti Constitutional Chamber iti Korte Suprema iti Venezuela, kasapulan ni Rodríguez nga agbalin nga acting president tapno masigurado ti administrative continuity ken comprehensive defense iti nasao a nasyon.
Sigun iti korte,kasapulanda nga adalen dagiti mabalin a maaramat a legal framework tapno masigurado nga agtultuloy ti panakaituray ti gobyerno iti opisyal ti Venezuela, ken masalakniban ti soberanya daytoy.
Impeksa metten ti pwersa militar iti Venezuela ti suporta ken panangbigbigda kenni Rodríguez kas acting president iti 90 nga aldaw.
Maipalagip a kalpasan ti panakaarestar ni Maduro ket impakaammo ni United States President Donald Trump a panggepna nga iturayan ti Venezuela agingga a mapasamak ti “judicious transition.”
Malaksid iti dayta, nagpangta pay ni Trump a kontrolinna dagiti oil reserves iti Venezuela.
Ni Maduro ket sumangsango iti kaso iti Estados Unidos a mainaig iti Narco-Terrorism Conspiracy, Cocaine Importation Conspiracy, Possession of Machineguns and Destructive Devices, ken Conspiracy to Possess Machineguns and Destructive Devices.
