Silulukat dagiti kalsada iti Bokod, Benguet iti baet iti pangta ti landslides ken soil erosion ita a panagtutudo.
Iti interview iti Bombo Radyo kenni Bokod Mayor Erik Donn Ignacio, awan ti naireport kadakuada a kaso iti panagsara dagiti kalsada ken major landslides.
Sigun kenni Mayor Ignacio, adda laeng dagiti napasaran a babassit a panagregga-ay iti daga ngem saan daytoy a nakaapektar iti panagbiahe dagiti motorista gapu ta dagus metlaeng a mawakwaknitan.
Nakasagana ti Bokod, Benguet kadagiti posible a bagyo iti baet nga amin a disso iti daytoy ket narisgu iti landslides ken soil erosion.
Kasta met a nakagasana dagiti kameng iti Disaster Risk Reduction and Management Office nga agresponde iti kanito nga adda iti emerhensiya nu sadino, sigun kenni Mayor Ignacio ket addaanda iti maaramat a kagawaan pakairamanan iti Patient Transport Vehicle a kaaw-awatda laeng manipod iti Philippine Charity Sweepstakes Office (PCSO).
Kabayatanna, agtaltalinaed latta a mabanbantayan ti Benguet-Vizcaya Road iti posible a panagregga-ay iti daga nangruna ta adu dagiti dumaldalyasat a lugan iti daytoy nga agtaud kadagiti nagduduma a probinsya.//Bombo Rob Dominguez
