Napadayawan ti Bombo Radyo kas Radio Station of the Year iti RCM Pro Patria Journalism Awards 2026 a naangay sadiay Makati City idi June 11, 2026.
Dinakamat ti awards committee ti nabayagen a panagkumit ti Bombo Radyo Philippines a mangipaay iti mapagtalkan a damag, impormasion, ken serbisio publiko kadagiti Pilipino iti intero a pagilian.
Nabigbig metlaeng ti napateg nga akem ti Bombo Radyo bayat dagiti bagyo, didigra, ken emerhensia babaen kadagiti impromasyon a maipadpadanun iti komunidad para iti kinatalged.
Inawat ni Vice President ken COO Herman Z. Basbaño ti pammadayaw iti nagan ti sibubukel nga estasyon.
Para iti Bombo Radyo Philippines, ti pammigbig ket mangpaneknek manen iti panagkumit iti responsible broadcasting ken public service.
Kagiddan daytoy ti agtultuloy ti panagserbi kadagiti minilion a Pilipino babaen ti 32 a nationwide networks, dominante ken fully digitalized AM ken FM station.
Iti nasurok nga innem a dekada manipud idi naipasdek idi Hulio 6, 1966, ti Bombo Radyo Philippines ket mapagtalkan a kadua dagiti Pilipino iti panawen ti balligi, krisis, ken panagbalbaliw.
Kabayatanna, ti Bombo Radyo Philippines ti kakaisuna a provincial radio network a direkta a mangidanon kadagiti damag manipud Malacañang ken Metro Manila kadagiti agdengdengngeg kadagiti probinsia.
Addaan daytoy iti nalawag a mision a mangipakaammo iti sipupudno, mangireport nga awan buteng, ken agserbi nga addaan iti responsable.
