BAGUIO CITY – Ad-adda a bimmileg ti boses dagiti agtutubo ti siudad ti Baguio, nangruna iti lokal a konseho.
Impeksa daytoy ni Baguio City SK Federation President Levy Lloyd Orcales iti panakiyuman ti Bombo Radyo kenkuana.
Kinunana nga addan ti SK Federation a mangtulong, mangigiya ken sumuporta iti abilidad ti tunggal agtutubo ditoy siudad ti Baguio.
Innayonna nga addan ti baro a rupa ti SK iti siudad kagiddan ti panagkiddawna iti panakikaykaysa dagiti amin nga agtutubo, ti panangipaay dagitoy iti laing, ideya, abilidad para iti pagsayaatan ti SK.
Kabayatanna, naamuan a ni Orcales ket sigud nga SK chairman ti Barangay South Central Aurora Hill idi 2010 idi agtawen iti 15 bayat a nagbalin a barangay kagawad idi 2015 idi agtawen ti 18.
Sigun pay iti 22-anyos a lider, saanna a ninamnama a daytoy ti mangabak manipud kadagiti uppat a nainominar para iti kinapresidente ti pederasyon dagiti agtutubo ditoy siudad ti Baguio.
