BAGUIO CITY – Inlawlawag manen ti Department of Education – Cordillera nga awan ti mabayadan ita a nangrugin ti Brigada Eskwela ken enrollment dagiti estudyante kadagiti parapubliko a pagadalan.
Iti panakipatang ti Bombo Radyo kenni Georaloy Palao-ay, information officer ti Dep-Ed Cordillera, nailanad iti pagalagadan dagitoy nga awan ti nasken a masingir a babayadan ti estudyante ken nagannak agingga iti panagrugi ti klase.
Nupay kasta, kinunana a no adda man dagiti masingir a babayadan ket nasken a napagnumuan daytoy iti Parents Teacher’s Association (PTA).
Gapu iti daytoy, guyguyuguyen ni Palao-ay dagiti nagannak a kanayunda a makipaset kadagiti taripong nga ipatpatungpal ti PTA ken ti pagadalan tapnu maamuanda dagiti napagnunumuan iti daytoy kas kadagiti babayadan.
Innayonna met a no adda ti reklamo dagiti nagannak ket napimpintas a kaumanda ti pagadalan wenno saan ket agturongda laeng iti Regional Office ti Dep-Ed.
Kabayatanna, pormalen a nangrugi ti 2018 Brigada Eskwela babaen iti kick-off a naipatungpal sadiay Apayao.