Pakabuklanen a 15 a buy-bust operations ti impatungpal dagiti kameng iti Baguio City Police Office manipod Enero agingga ngudo iti bulan iti Marso.
Iti panakiuman ti Bombo Radyo kenni Police Major Marcy Grace Marron, ti Public Information Officer ti Baguio City Police Office, iti nadakamat a bilang dagiti buy-bust operations, 19 met nga indibidual ti naarestar a pakairamanan iti maysa a menor de edad.
Mainaig iti dayta, imbinglay met ni Police Colonel Ruel D. Tagel, City Director ti Baguio City Police Office a kitkitaenda ti posibilidad a gungundawayan dagiti sumagmamano mga indibidual ti panagturong iti Baguio City ken agpammarang a turista ngem mangipuslit gayam iti iligal a droga.
Gapu iti dayta, inaklon ti city director a maysa a “very serious” a parikut ti iligal a droga iti City of Pines.//Bombo Genzel Depayso
