BAGUIO CITY – Madanagan dagiti buyers a gumatgatang kadagiti nateng dagiti mannalon manipud iti Benguet, Mountain Province ken Ifugao iti epekto ti nairtengan pay nga ECQ sadiay Metro Manila.
Iti panakiuman ti Bombo Radyo Baguio, imbinglay ni Agot Balanoy, panakabagi dagiti asosasyon iti La Trinidad Vegetable Trading Post a gapu iti curfew ti Metro Manila nga alas-otso ti rabii agingga alas-kwatro ti parbangon ket maapektaran met ti oras ti panagilako dagiti buyers kadagiti nateng a ginatang dagitoy.
Kinunana a kadawyan a pasado alas-sais ti rabii a makasangpet ti buyer sadiay Manila ken sadiay nga irugida metten ti agilako.
Nupay kasta, mangnamnamada a mangipaulog dagiti mayor ti Metro Manila iti pammilin para iti panakailaksid dagiti nasao a vegetable buyers ken dagiti kliyente dagitoy iti curfew a kas iti napasamak idi napalpalabas a panag-ECQ ti Metro Manila.
Dinakamat ni Balanoy a maamuanda inton bigat no mapatgan ti tarigagay dagiti vegetable buyers.
Inlawlawagna a no maapektaran ti panaglako dagiti nasao a buyers gapu kadagiti restrictions iti agdama a pandemya ket kissayan dagitoy dagiti angkatenda a nateng dagiti mannalon.
Sigun kenkuana, agresulta met daytoy iti panagbaba ti presyo dagiti nateng.
Kabayatana, masubsubbot metten dagiti mannalon nga agiturturong iti natengda kadagiti trading centers sadiay La Trinidad, Benguet ti panakalugi dagitoy kadagiti napalpalabas a bulan kasaruno ti panagngato ti presyo dagiti nateng ita a panawen.
Iti panakiuman ti Bombo Radyo Baguio kenni Agot Balanoy, panakabagi dagiti asosasyon iti La Trinidad Vegetable Trading Post, kinunana nga iti agdama ket ‘above cost of production’ ti balor dagiti nateng.
Dinakamatna a dakkel daytoy a banag kadagiti mannalon kalpasan a nalugi dagitoy gapu iti ‘below cost of production’ wenno nababa unay a presyo dagiti nateng manipud pay idi Pebrero ti agdama a tawen.
Imbinglayna nga idi agsapa ket ti wholesale price ti repolyo sadiay iti La Trinidad Vegetable Trading Post ket dumanon iti P65-P75.
Inlawlawagna pay a ti panagngina ita dagiti nateng ket ti bimmassit a suplay dagiti nateng nga intunda ti panakadadael ti dadduma kadagitoy gapu iti agdama a nepnep.
