Nagun-od ti Bases Conversion and Development Authority (BCDA) ti kontrol iti Camp John Hay iti siudad ti Baguio partikular ti The Manor, The Forest Lodge, Camp John Hay Golf Club, CAP Convention Center, Commander’s Cottage, dagiti open spaces ken dagiti daduma pay.
Daytoy ket kagiddan ti nagbalin a groundbreaking a desisyon ti Korte Suprema.
Maibasar iti ruling ti korte suprema, naipalubos ti panangsubli ti Bases Conversion and Development Authority (BCDA) iti Camp John Hay manipud iti CJH Development Corporation (CJH DevCo), maysa a balligi para kadagiti Pilipino gapu ta mangilukat daytoy iti oportunidad kas iti investments a mangipaay iti trabaho, mangpadur-as iti ekonomiya ken mangbenepisyo kadagiti ado a tattao kadagiti umay pay a tawen.
Sigun kenni Bases Conversion and Development Authority (BCDA) President ken Chief of Executive Officer Joshua M. Bingcang, daytoy a balligi ket mang-allukoy iti ado nga investment ken proyekto a mangpasayaat iti socioecomic opportunities ken mangprotektar kadagiti interes ti amin.
Kinunana pay a kagiddan ti panakailukat ti oportunidad ket ado a negosyo ti sumrek manen iti Camp Joh Hay.
Iti order a naka-petsa idi Enero a tres iti agdama a tawen, pinatgan ti Branch 6 ti Baguio Regional Trial Court ti pangngeddeng ti korte suprema ken imbasurada ti baro a gandat ti CJH Development Corporation (CJH DevCo) a manglapped iti naan-anay a pannakaisubli ti Camp John Hay.
Gapu iti dayta, amin a subsidiaries, affiliates, wenno anyaman nga okupado ti CJH Development Corporation (CJH DevCo) ket maisubli iti BCDA iti kabiitan a panawen.
Impasigurado met ti Bases Conversion and Development Authority (BCDA) nga agtuloy ladta ti operasyon sadiay Camp John Hay bayat a makidkiddaw met ti panakitinnulong dagiti stakehoders para iti seamless transition ti Camp John Hay.
