BAGUIO CITY – Maisayangkat ti candle lighting ditoy siudad ti Baguio inton Mayo 25 para kadagiti indibidual a pimmusay gapu iti sakit nga HIV-AIDS.
Maisayangkat daytoy iti City Health Services a dar-ayan dagiti nagduduma a grupo kas paset ti pananglagipda kadagiti pimmusay ken agsagsagba iti nasao a sakit.
Sigun kenni Nurse II Cristina Juan, napateg ti panakipaset ti publiko iti nasao nga aktibidad gaputa makaipaay daytoy iti panaka-ammo seknan iti nasao a sakit ken kadagiti programa ken proyekto ti gobyerno para iti daytoy.
Impettengna nga agtaltalinaed ti commitment ti lokal a gobyerno iti information education campaign nga ipatpatungpalda nangruna iti nangato a risgo a maipaay ti nasao a sakit iti maysa nga indibidual.
Naamuan a 30 ti bilang dagiti indibidual iti siudad a nakaptan ti HIV ti maipaspasidong ita iti intervention babaen iti lokal a gobyerno bayat a manipud Enero agingga Abril ket 10 ti baro a kaso ti HIV ti nailista dagitoy.
Kaaduan pay laeng kadagiti nakaptan ket dagiti lallaki a nakinaig iti pada dagitoy a lallaki.
