Narekober iti Philippine National Police (PNP) ti CCTV footage iti maysa a beach resort idiay Dipaculao, Aurora nu sadinno nalmes ti dua nga Ateneo de Manila University basketball players.
Sigun kenni PNP Chief Gen. Jose Melencio Nartatez Jr., agtultuloy ti imbestigasion usar ti forensic ken ebidensia a wagas tapno maamuan ti pakabuklan a napasamak, ken makikoordinar metlaeng ti pulisia iti dadduma pay nga ahensia.
Napasamak ti insidente bayat nga adda iti team-building activity dagiti players idi naiguyod iti napigsa a dalluyon. Narekober dagiti bagida tallo pulo agingga uppat a pulo a minutos kalpasan ti insidente nga asideg iti igid iti baybay.
Nagkiddaw ti PNP iti publiko a liklikan ti espekulasion ken panagraem iti pamilia dagiti biktima bayat a maisaysayangkat ti imbestigasion.
Nangipadanon metlaeng iti panakipagladingit ti Ateneo de Manila University.
